«AMANAT» partııasynyń tóraǵasy Erlan Qoshanov Memleket basshysy bıylǵy 19 naýryzǵa taǵaıyndaǵan Májilis pen barlyq deńgeıdegi máslıhattar depýtattaryn merziminen buryn saılaýǵa qatysty málimdeme jasady, dep habarlaıdy Egemen.kz.
Erlan Qoshanov atalǵan sheshim qoǵam úshin de, eldegi saıası kúshter úshin de kútpegen jaǵdaı emes ekenin jetkizdi. Sebebi Prezıdent byltyr qyrkúıek aıynda saılaý kúntizbesin aldyn ala, ashyq jarııa etken bolatyn.
«Bul – eldegi konstıtýsııalyq reformalardyń zańdy jalǵasy. Sondyqtan «AMANAT» partııasy Memleket basshysynyń bul sheshimin tolyq qoldaıtynyn málimdeıdi. Bul saılaý – jańa demokratııalyq dástúrler qalyptastyrýǵa muryndyq bolady. Elimizdiń árbir azamaty osy saıası naýqannyń júgi men jaýapkershiligin tereń sezinýi kerek. Sebebi memlekettiń táýelsizdigi men turaqty damýy úshin, halqymyzdyń beıbit ómiri men baqýatty turmysy úshin bárimiz jaýaptymyz», dep málimdedi partııa Tóraǵasy.
Erlan Qoshanov «AMANAT» partııasy az ýaqyttyń ishinde túbegeıli transformasııadan ótkenin jáne aldaǵy saılaýǵa tas-túıin daıyn ekenin atap ótti.
«AMANAT» partııasy – elimizdegi baıypty bastamalardyń, oń ózgeristerdiń basty qozǵaýshy kúshi. Biz jalań uran, qurǵaq ýáde emes, naqty istermen aınalysyp kelemiz. Oǵan – halyq kýá! Sondyqtan biz aldaǵy saılaýdyń ultty uıystyratyn, eldi biriktiretin saıası naýqan bolǵanyn qalaımyz. Memlekettiń múddesi, eldiń bolashaǵy jolynda jaqtastarymyzben de synshylarymyzben de qoıan-qoltyq, konstrýktıvti jumys isteýge daıynbyz. Barlyq qazaqstandyqtardy aldaǵy saılaýǵa belsendi túrde qatysýǵa shaqyramyz», dedi «AMANAT» partııasynyń Tóraǵasy.